ТӨРИЙН  БАЙГУУЛЛАГЫН АЛБАН ХААГЧДАД  ЦАЛИНГИЙН НЭМЭГДЭЛ ОЛГОХ АЖЛЫГ СУДЛАХ, ТООЦОО ХИЙХ АЖЛЫН ХЭСЭГ БАЙГУУЛАХААР БОЛЖЭЭ

Орхон аймгийн  Засаг даргын зөвлөлийн хурлаар Цалингийн нэмэгдэл, Хүүхдийн мөнгөний олголт зэрэг асуудлаар холбогдох байгууллагуудын мэдээллийг сонслоо. 

Оны өмнө буюу  арванхоёрдугаар сарын 2-нд  аймгийн ИТХ-ын хуралдаанаар Нэгжийн тухай хууль, Төсвийн тухай хуулийн хүрээнд орон нутгийн төсөвт  байгууллага буюу орон нутгаас цалинждаг төрийн албан хаагчдын цалинг 2023 оны нэгдүгээр сарын 1-нээс эхлэн 40 хувиар нэмэгдүүлэхээр шийдвэрлэсэн. 

 Үүний дагуу Хот тохижуулах зэрэг орон нутгийн төсөвт байгууллагын ажилтан алба хаагчдын цалин 40 хувиар энэ сарын 1-ний өдрөөс нэмэгдсэн. 

Харин  улсын төсвөөс цалинждаг босоо удирдлагатай төрийн байгууллагуудын цалин нэмэгдээгүйгээс улбаатай цалингийн зөрүү үүсээд байгаа юм. 

Аймгийн удирдлагуудын хувьд төрийн  байгууллагын  бүх шатны ажилтан алба хаагчдын цалинг адил төвшинд нэмэх байр суурьтай байгаа. 

Тиймээс ажлын хэсэг  байгуулж  хууль эрх зүйн хүрээнд  боломж юу байгааг судлах, тооцоо судалгааг хийхээр болов.