2024 оны 3-р сард нэг тонн зэсийн үнэ 8394 -8906 ам.долларын хооронд хэлбэлзэж дунджаар 8675.63 ам.доллар байгаа нь өнгөрсөн 2-р сарын дундаж үнэтэй харьцуулахад 364.89 ам.доллараар буурсан үзүүлэлттэй байна. Молибдены үнэ 3-р сард 2-р сартай харьцуулахад тонн тутамд 577.6 ам доллараар буурсан бол цагаан мөнгөний үнэ kг тутамд 55.52 ам доллараар өсжээ.

2024 оны 3-р сард зэсийн баяжмалын спот худалдааны хайлуулах цэвэршүүлэх зардлын бууралттай холбоотойгоор БНХАУ-ын зэс хайлуулах үйлдвэрүүд цэвэр зэсийн үйлдвэрлэлээ бууруулах, төлөвлөгөөт засварын ажлаа урагшлуулах болсонтой холбоотойгоор цэвэр зэсийн худалдан авалт нэмэгдэж зэсийн үнэ сүүлийн 11 сарын турш гараагүй түвшинд хүрч өсөхөд нөлөөллөө. Зэсийн үнэ сарын сүүлээр эргэн суларсан нь ам. долларын ханш чангарсантай холбоотой гэж SMM судлаачид мэдээллээ. АНУ-ын Холбооны Нөөцийн банкны захирал Waller инфляц өндөр хэвээр байгаа учир зээлийн хүүг бууруулахад эрт байна гэж мэдэгдсэн нь ам долларын ханш чангарахад нөлөөлөө.

2024 оны 1-р сард судалгааны байгууллагуудын гаргасан нэг тонн зэсийн 2024 оны 1-р улирлын дундаж үнийн прогноз 7000-9370 ам долларын хооронд хэлбэлзэж дунджаар 8300 ам доллар байлаа. Судалгааны байгууллагуудаас Pezzo Economics -ийн судлаачид 2024 оны зэсийн улирлын дундаж үнийг 13 ам.долларын зөрүүтэй буюу бодит үнэтэй хамгийн ойроор тодорхойлсон бол Banco de Crédito de Peru, Investec, Goldman Sachs банкнуудын судлаачид 2024 оны 1-р улирлын дундаж үнийг 44 ам. долларын зөрүүтэйгээр тодорхойлжээ.

2024 оны 4-р сарын эхний 10 хоногт зэсийн үнэ 8920 -9365 ам.долларын хооронд хэлбэлзэж дунджаар 9181 ам.доллар байгаа нь өнгөрсөн 3-р сарын дундаж үнэтэй харьцуулахад 505 ам.доллараар өссөн үзүүлэлттэй байна.